រុស្សី៖ អ្នកគាំទ្ររាបប់ម៉ឺននាក់កំពុងដាក់គោលដៅធ្វើដំណើរមកកាន់ទីក្រុង St. Petersburg របស់រុស្សី ដើម្បីចូលរួមទស្សនាផ្ទាល់ក្នុងព្រឹត្តិការណ៍បាល់ទាត់ធំបំផុតនៅអឺរ៉ុប EURO 2020 ខណៈដែលអាជ្ញាធរបានសម្តែងនូវក្តីព្រួយបារម្ភដោយសារករណីឆ្លងថ្មីនៃវីរុសកូវីដ-១៩ នៅតែជាបញ្ហាចោទធំមួយនៅក្នុងទីក្រុងនេះនៅឡើយ។

ទីក្រុងធំបំផុតលំដាប់ទី២របស់រុស្សីមួយនេះ នឹងត្រូវទទួលស្វាគមន៍ការប្រកួតចំនួន ៧ប្រកួតនៅកីឡដ្ឋាន Krestovsky Stadium ដែលអាចផ្ទុកទស្សនិកជនរហូតដល់ ៦៧,៨០០នាក់ និងបើកឱ្យមានអ្នកទស្សនាផ្ទាល់ចំនួន ៥០ភាគរយ រួមមានការប្រកួត ៣ក្នុងពូល B និង ៣ប្រកួតទៀតក្នុងពូល E ព្រមទាំងការប្រកួតវគ្គ ៨ក្រុមចុងក្រោយមួយប្រកួតទៀតនៅថ្ងៃទី០២ ខែកក្កដា បន្ទាប់ពីព្រឹត្តិការណ៍បាល់ទាត់ EURO នេះត្រូវបានពន្យារពេលមកពីឆ្នាំ ២០២០ ដោយសារការរាតត្បាតនៃវីរុសកូវីដ-១៩។ 

ក្រុមអ្នករៀបចំព្រឹត្តិការណ៍នេះបានអះអាងថា វិធានការដ៏តឹងរ៉ឹងមួយនឹងត្រូវអនុវត្តទៅលើក្រុមកីឡាករ មន្រ្តីរៀបចំការប្រកួត បូករួមទាំងអ្នកគាំទ្រដែលមកទស្សនាការប្រកួតផ្ទាល់ផង ខណៈមជ្ឈដ្ឋានទូទៅបានរិះគន់ចំៗជុំវិញការទទួលជាម្ចាស់ផ្ទះនេះ ត្បិតទីក្រុង Saint Petersburg នេះគឺជាទីក្រុងចំណុងក្តៅមួយនៃការរីករាលដាលខ្លាំងនៃវីរុសកូវីដ-១៩។ តួយ៉ាង ក្រោយពីទ្វីបអឺរ៉ុបបានបញ្ចប់ការបិទខ្ទប់ ទីក្រុងនេះបានបើកដំណើរការឡើងវិញដូចគ្នា ក្នុងការរាយការណ៍ករណីថ្មីចំនួនជាង ៧០០ករណីក្នុងមួយថ្ងៃរយៈពេល ១ខែចុងក្រោយ ខណៈពីរសប្តាហ៍កន្លងទៅ ចំនួនអ្នកឆ្លងត្រូវបានរាយការណ៍ដោយអាជ្ញាធរក្នុងតំបន់ថាមានការកើនឡើងរហូតដល់លើសពី ៨០០ករណីក្នុងមួយថ្ងៃ៕